بولو ہیلپ لائن نے بارے وچ
بولو ہیلپ لائن برنارڈوز نیشنل ایمرجینسیز ٹرسٹ نی مالی مدد نال اکتوبر نی پہلی تاریخ شروع کیتی اے ایہہ ہیلپ لائن انہاں کالیاں، ایشیائی تے اقلیتی نسلی خانداناں اوپروبا نے اثر نا رد عمل آ جنہاں اوپر بغیر تناسب تھیں اثر ہویا
ہیلپ لائن اوپر کم کرنے آلے لوک یا کالے ، ایشیائی تے اقلیتی نسلی خاندان این یا جہیڑے پہلےبچیاں، جوانان تے انہاں نیاں کہرے نیاں لوکاں نی خدمت نا پیشہ وارانہ تجربہ رکھنے انہاں خانداناں وچوں
اساں کس طرحے مدد کری سکنے آں؟
کیہ تس کووڈ -19 تھیں متاثر کالے، ایشیائی یا اقلیتی نسل نے بچے، جوان، ما پیو یا دیکھ بھال کرنے آلے او؟ اگر تھے او تے، تساں کی سوگ، نقصان، بے روزگاری، پیسیاں نی پریشانی، اپنے بچے نی تعلیم تے اشنے آلے ٹیم نی فکر، اپنے دوستے یا کنبے نی پریشانی، لاک ڈاون آسطے پریشان تے دباؤ نا شکار ہونے نا تجربہ ہویا ہوسی انہاں تھی علاوہ تساں دویاں مسئلیاں آسطے وی پریشان ہوئے ہوسو تساں اپنیاں مسئلیاں، پریشانیاں تے دباؤ نے بارے وچ اس ویلے ساڑے نال گل کری سکنے او تےاس تساں کی جذباتی مدد تے عمل نے قابل صلاح دئی سکنے آن تے تساں نیاں پریشانیاں تے مسائل نے باری وچ دوئیاں اداریاں وچ دسی سکنے آن جہیڑے ہور مدد دئی سکنے۔
جہیڑی مدد اساں دینے آں اوہ تساں تے انہاں بچیاں واسطے اے جنہاں نی تساں دیکھ بھال کرنے او۔ تُس آساں کی کال کری سکنے او یا فیر اسان نال ساڑی ویب سایٹ موجود ویب چیٹ نی سہولت نے ذریعے ساڑے نال گپ لائی سکنے او۔ تساں کی اسائیں تساں نی تفصیل دسنے نی کوئی لوڑ نئیں لیکن اگر تس چاہنے او کہ تساں کی ساڑی تھراپسٹ نی ٹیم کول پہیجیا جائے یا کسے دوسری خدمت کول پہیجیا جائے تے فیر اساں کی تساں نی تفصیل نی لوڑ پیسی تے او تساں نی مرضی نال اگے پہیجی جاسی۔ تساں بوں ساریا مسئلیاں اوپر چنگی صلاح آسطے ساڑی ویب سائٹ اپر جائے تکی سکنے او، جیاں جذباتی حفاظت، مدد کرنے والے خاندان، دکھ تے نقصان
جدوں تساں ہیلپ لائن نال ربطہ کرنے او تے کیہ ہونا ؟
تساں کی ہیلپ لائن نے صلاح دینے آلے بندے نی طرفوں ہک دوستانہ جواب ملسی جہیڑا تساں تے/یا تساں نے بچیاں اوپر گزرنے آلی حالت نے بارے وچ گل کر سی ہیلپ لائن اوپر صلاح دینے آلہ بندہ تساں نی گل سُنسی تے تساں نی مطلوبہ مدد یا صلاح نے بار وچ فیصلہ کرنے آسطے تساں نی مدد کرسی۔ تساں نی مرضی نال ہیلپ لائن اوپر صلاح دینے آلا بندہ تساں کی فون کرسنے واسطے تساں نا نمبر کنہی سکنا تے اوہ تساں آسطے مناسب ٹیم اوپر تسان کی مڑی فون کری سکنے۔
ہیلپ لائن اوپر صلاح دینے آلا بندہ تساں یا تساں نیاں بچیاں آسطے ساڑے تھراپسٹس نال گل کرانے نا بندوبست کرائی سکنا، جہیڑا تساں نے چھے کونسلنگ سیشن کراسی تے ضروت پینے اوپر ہور سیشنز نی پیشکش کری سکنے۔ جہیڑے سیشز فون اوپر ہوسن ہفتے وچ ہک یا دو دفعے، اوہ تساں نے خاندان نے حالات تے ضرورت اوپر منحصر اے۔ پہلا تے چھیواں سیشن 45 منٹ نہ ہوسی جس نے وچ خاندان یا کِسے بندی نے ترے بڑیاں مسئلیاں نی ابتدائی معلومات کہندیاں جاسن تے آخری سیشن وچ خدمت نی ترقی نے بارے وچ گل بات کیتی جاسی تے اس کی نوٹ کیتا جاسی۔ پہلے توں پنجویں تک ہر سیشن 30 منٹ نا ہوسی جس نے وچ پہلے سیشن نے ذریعے شناخت کیتے گئے بڑیاں مسئلیاں نے آسطے تھراپی نے ذریعے مدد کیتی جاسی۔
کیہ مدد مختلف زباناں وچ دتی جاسی؟
اساں نے ہیلپ لائن اوپر موجود صلاح دینے آلے انگریزی، اردو، ہندی، میرپوری تے پنجابی وچ تساں نی خدمت کری سکنے۔ دسمبر 2020 وچ دستیاب زباناں ایمہارک تے ترینگیا تک پھیلی جاسن تے دوئیاں زباناں نےترجمہ کرنے آلےملی سکنے۔ تھراپی نے ذریعے سیشن تھلے لخیاں زباناں وچ دتے جائی سکنے: انگریزی، بنگالی، ہندی، فرانسیسی تے یونانی۔
کیس سٹڈی
ایہہ کیس سٹڈیز مثالاں دیسن کہ بولو ہیلپ لائن کس طرحے مدد کری سکنی۔
مارتھا دو نوے جواناں نی ما ایہہ جیہڑے ہک مقامی ہائی سکولے وچ پڑھنے۔ مارتھا اپنے 15 سالے نے پترے نے بارے وچ فکر کرنی کر شروع کیتی کیاں کہ اوہ اس خوفے ماریاں سکولے نیسا جانا کہ اسکی کرونا وائرس لٖغی جاسی۔ مارتھا ایہہ گل اس نے استاد کی دسی تے انہاں اس کی مدد آسطے بولو ہیلپ لائن نا نمبر دتا۔
مارتھا ہیلپ لائن نال رابطہ کیتا تے اس نی گل ناز نال ہوئی جہیڑی ہیلپ لائن اوپر صلاح دینے آلی ایہہ۔ مارتھا ناز کی تھلے لخیاں نیاں گلاں دسیاں: " مہاڑے پترے سنیا کہ کلے لوک کووڈ نال زیادہ مرنےتے ہن اس کی پریشانی نے دورے پینے۔ اوہ اساں کی پوشنا کہ اس سارے مرن لگے آں تے اوہ سکول جانے آسطے کہروں نئیں نکلنا لغا نا۔ اساں اُس نے بارے وچ بوں پریشان آں تے سمجھ نئیں اشنی پئی کہ کہہ کراں۔" ناز بوں ساریاں کالاں نے دوران مارتھا نال کم کیتا تے اس نے پترے آسطے اس نیاں پریشانیاں تے خوفاں نے بارے وچ گل بات کیتی تے اس گلے اوپر اتفاق ہویا کہ اس نا پتر انہاں پریشانیاں نے بارے وچ تھراپسٹ نال مشاورت کرسی۔ مارتھا تے اس نا پتر دواں تھراپسٹ کولوں لاہدے لاہدے مشاورت نے سیشن کہننے شروع کیتے .مارتھا نا پتر ہن کووڈ 19 نے بارے وچ پریشانیاں نے انتظام کرنے نے رستے اوپر اے۔
کیس سٹڈٰی
کاہلوں اپنے فیس بک پیج اوپر تکی تے ویب چیٹ اوپر ہیلپ لائن نال رابطہ کیتا۔ اس اے دسیا کہ اس کی پہلے لمبی چھٹی اوپر رکھیا نا سا نے تے فر اس کی بےروزگار کری شوڑیا نے۔ اوہ اس بارے وچ فکرمند آ کہ اوہ نہ تے کرایہ دئی سکنا تے نہ اپنے کہرے آلیاں آستے کھانے پینے نا سمان خریدی سکنا۔ ویب چیٹ اوپر ہیلپ لائن اوپر صلاح دینے والے نال گپ شپ نال دوران ، انہاں صلاح دینے والیاں کی آخیا کہ اوہ انہاں کی فون کری تے انہاں نے حالات اوپر گل کرے۔ سارہ جہیڑی ہیلپ لائن اوپر صلاح دینی، کاہلوں کی کال کیتی تے انہاں اس نے حالات اوپر گل بات کیتی۔ .سارہ ساریاں معلومات کہندیاں تے کاہلوں نال اس گلے اوپر متفق ہوئی کہ اوہ برنارڈوز نیاں دوئیاں خدمات کولوں معلومات کہنیسی کہ کس کی مدد کرنی چاہی نی۔ سارہ بوں ساریاں انہاں مقامی خدمات نال گل کیتی جتھے کاہلوں رہنا یا کم کرنا تانجے اس گلے نی شناخت ہوئی سکے کہ کاہلوں تے اس نے خاندان نی مدد کرنے آسطے سب تھی چنگی خدمت کہیڑی اے۔ سارہ فر ایہہ معلومات کاہلوں کی دتیاں ، جس ہک مقامی خیراتی ادارے نال ربطہ کیتا جنہاں اس نی تے اسنے کہرے آلیاں نی مدد کیتی۔
ساڑا ویژن کالے، ایشیائی تے اقلیتی نسل نے بچیاں تے جواناں لوکاں کی تکنا انہاں نی اندرونی طاقت کی بڑھانا تانجے اور وبا نے دوران تے اس تی بعد نے مسائل نا سامنا کری سکن۔ :اساں نے اس ویژن کی حاصل کرنے آسطے اساں تساں نال کم کرنا پسند کرساں، اس آسطے مہربانی کری تے ساڑے نال گل کرو اگر تساں کی مدد چاہی نی تے رابطہ کرو:
مفت فون: 0800 151 2605
ای میل: Boloh.helpline@barnardos.org.uk
ویب سائٹ: https://helpline.barnardos.org.uk/